رد راجل يقول بقلم شهيرة عبد الحميد

على مراتي هو صحيح أنا ليه بطلت اقولها كلام حلو مع أني نفسي اتغازل زي زمان.
طب ليه هي بس اللي مستمرة أنها تحتفل بيا وتجبلي هدايا وانا قطعت ده من بعد الجواز على طول
وليه مبفكرش أعتذرلها ولا علشان بلاقيها تاني يوم بتضحك فبقول مش ضروري ومش هيفرق.
طول الوقت حاسس إني كتير عليها خصوصا إني شكلي حلو وهدومي منسقة ومش باين عليا أن عندي عيال لكن دلوقتي بس حسيت أنها هي اللي كتير عليا وأنها لو رمتلي العيال يوم واحد بس همشي اكلم نفسي في الشوارع.
نزلت من عند أمي وأنا بفكر إزاي اتجرأ واعبرلها عن اللي جوايا ومشيت بدور بعيني في
المحلات إيه اللي ممكن تكون نفسها فيه وبتحبه!
واكتشفت إني حتى جاهل الأشياء اللي بتحبها مراتي للدرجادي أنا بعيد عنها ونسيتها وهي طول الوقت جنبي
عيني وقعت على كشك ورد بالصدفة في زاوية كده ومش باين دخلت لقيت راجل كبير نايم على مكتبه اول ما حس بدخولي قام وقالي خطوبة ولا صحبتك
ضحكت وقولتله أم العيال.
رجع مطرحه وقبل ما ينام تاني قالي يجدع هو في حد بيجيب لمراته ورد دلوقتي هاتلك لفتين لحمة وكله هيبقى تمام منها لله معايا بومة.
أسلوبه رغم أنه واضح شديد ووشه عبوس ومش بشوش حسيت اني انجذبت للي قاله وقعدت قدامه على المكتب وسألته مين دي اللي بومة يا حج قوم كده فضفضلي ماهو اليوم ناقص وعايز اكمله.
قام بصلي وقالي مراتي الله ياخدها ياجدع الحريم دول ولا بيطمر فيهم يعني عيشت طول عمري بهين كرامتها لما عدمتها العافية ولما حسيت اني خلاص كبرت وقولت أصلح شوية من اللي فات قبل فوات الأوان كل ما أحاول معاها باللين تستقبل كل تصرفاتي بنفس الوش المقلوب حريم سكة يابني مبيجوش غير بالنكد.
سمعت منه للأخر وقولت اشوف إيه في الكشك عنده ينفع اشتريه واصلح غلطتي وخلاص وهي حرة أنها تقبل اعتذاري أو ترفض المهم أرضي ضميري وأعرف أنام.
لاحظت أن عنده تلات حوائط عليهم ورد مختلف ركن للورد الفاسد خالص وركن للورد اللي دبلان شوية